Arweiniwyd y prosiectau gan academyddion ar wahanol gamau yn y cylch ymchwil – o’r cam archwilio i brosiectau ymchwil gweithredol ac ymchwil yn y camau diweddarach sy’n anelu at ehangu eu potensial i greu effaith. Ymhlith y prosiectau roedd:

• meithrin cysylltiadau rhwng ymchwilwyr yn Aberystwyth ac Ewrop sy’n gweithio ar ddulliau o reoli poblogaeth gynyddol y granc Tsieineaidd goresgynnol (Dr Joe Ironside, Adran y Gwyddorau Bywyd)

• ehangu cyfranogiad mewn gŵyl lenyddol, gan sicrhau llwyfan i leisiau ar y cyrion, denu cynulleidfaoedd amrywiol a gwneud lleoliadau’n gwbl hygyrch (Dr Jacqueline Yallop, Adran Saesneg ac Ysgrifennu Creadigol) 

• datblygu dulliau o ddisodli lliwiau synthetig gyda dewisiadau ecogyfeillgar, diwenwyn sy’n deillio o gynhyrchion amaethyddol fel pigmentau naturiol o dyfu ffyngau (Dr Amanda Lloyd, Adran y Gwyddorau Bywyd) 

• defnyddio LEGO® fel dull hygyrch a chynhwysol i ddod â chyfranogwyr ynghyd a hwyluso trafodaethau i nodi cyfleoedd a heriau ar gyfer cynnwys dinasyddion mewn gwneud penderfyniadau (Dr Anwen Elias, Adran Gwleidyddiaeth Ryngwladol) 

• archwilio modelau newydd o ddylanwadu, hysbysu a chyd-greu polisi hinsawdd drwy gyfres o drafodaethau bwrdd crwn gyda ffermwyr lleol, gwyddonwyr defnydd tir a llunwyr polisïau (Dr Hannah Hughes, Adran Gwleidyddiaeth Ryngwladol; Yr Athro Mariecia Fraser, IBERS) 

• archwilio sut y defnyddiwyd ymyriadau creadigol yn y gorffennol i gefnogi adferiad iechyd meddwl a goroesi, a sut y gellir defnyddio’r wybodaeth hon i adeiladu arferion presennol a’r dyfodol (Dr Elizabeth Gagen, Adran Daearyddiaeth a Gwyddorau’r Ddaear)

• defnyddio dulliau creu zîn i ddadansoddi’n greadigol ac asesu’r heriau sy’n wynebu adfywio economaidd a datblygu cymunedol yn Aberystwyth a’r Wyddgrug yng Nghymru ac yn Mürzzuschlag yn Awstria (Dr Lyndon Murphy, Ysgol Fusnes Aberystwyth) 

• dwyn ymchwilwyr ym maes amaethyddiaeth ynghyd â thîm Cyswllt Ffermio i ddatblygu prosiectau ymchwil cydweithredol (Dr Natalie Meades, IBERS) 

• gyda chefnogaeth Cyngor Ffoaduriaid Cymru, defnyddio technegau tecstiliau arloesol a chwiltio traddodiadol Cymreig i archwilio sut y gall ymarfer creadigol helpu i adeiladu cysylltiadau o fewn ac ar draws cymunedau, cefnogi dealltwriaeth a gofal ar y cyd, a llywio gweithgareddau a pholisïau lloches (Dr Katy Budge, Adran Gwleidyddiaeth Ryngwladol; Dr Naji Bakhti, Adran Saesneg ac Ysgrifennu Creadigol) 

• adeiladu consensws rhwng Llywodraeth Cymru, partneriaid cyflenwi a busnesau fferm ar reoli clafr defaid yng Nghymru, gan gyfrannu at well iechyd anifeiliaid a lliniaru straen ar ffermwyr (Dr Simon Payne, Adran Seicoleg)

• sefydlu rhwydwaith academaidd Cymru-Iwerddon i lywio polisi cysylltedd digidol yng Nghymru ac Iwerddon er budd llunwyr polisïau, awdurdodau lleol a chymunedau gwledig (Dr Aloysius Igboekwu, Ysgol Fusnes Aberystwyth) 

• sefydlu rhwydwaith ymchwil ar rawnfwydydd bach a glaswellt ar gyfer ymchwilwyr gyrfa gynnar o amryw sefydliadau (Dr Aiswarya Girija, IBERS) 

• cyd-greu strategaeth ymchwil a nodi prosiectau ymchwil cydweithredol posibl i fynd i’r afael ag anghenion ymchwil iechyd a gofal cymdeithasol gwledig Canolbarth Cymru (Dr Thomas Wilson, Adran y Gwyddorau Bywyd; Dr Rachel Rahman, Adran Seicoleg; Dr Otar Akanyeti, Adran Gyfrifiadureg)

• sefydlu Rhaglen Dadansoddi Bwyd ar gyfer Powys i werthuso ansawdd maethol, blas a chynaliadwyedd ffrwythau a llysiau a dyfir yn lleol o’i gymharu â chynnyrch archfarchnadoedd (Dr Thomas Wilson a Dr Manfred Beckmann, Adran y Gwyddorau Bywyd) 

• cynhyrchu adnoddau i gefnogi’r pontio rhwng addysg gynradd ac uwchradd yng Nghymru, wedi’u cyd-greu gyda athrawon, disgyblion ac swyddogion addysg (Dr Siân Lloyd-Williams, Ysgol Addysg) 

• gweithdy rhyngweithiol yn dod â deg cyfranogwr ynghyd o Colombia, Mecsico, yr UD, Nigeria, Norwy a Tsieina i rannu straeon unigol am ymfudo ac ymgartrefu oddi mewn i Gymru amlddiwylliannol (Diana Valencia-Duarte ac Yi Li, Hanes a Hanes Cymru)