Beth yw Deialog a Chyfnewid Gwybodaeth
Mae’r Ganolfan Ddeialog yn darparu hyfforddiant ac yn hyrwyddo arferion arloesol ac arweinyddiaeth gydweithredol drwy weithio mewn dulliau ychydig yn wahanol.
Mewn deialog, mae pobl yn cyfathrebu drwy ddulliau amrywiol. Mae cyfranogwyr yn aml yn rhannu straeon, cyfranogi mewn gweithgareddau ymarferol sydd wedi cael eu cynllunio’n ofalus, a thrafod syniadau ar y cyd yn hytrach na dadlau â’i gilydd am safbwyntiau gwahanol. Mae’r dull hwn yn tueddu i feithrin empathi, annog creadigrwydd, ac ysgogi meddwl mewn dulliau newydd.
Mae gweithgareddau a gynhelir gan y Ganolfan Ddeialog yn creu mannau lle mae cyfranogwyr yn symud o gwmpas, gwrando ar straeon grymus, meddwl gan ddefnyddio eu dwylo, a siarad gan gyfeirio at eu profiadau a’u harbenigeddau. Mae pob profiad yn cael ei drin fel profiad gwerthfawr, ac rydyn yn annog y rhai sydd mewn swyddi uchel i wrando, dysgu, ac ymgysylltu ag eraill fel cydweithwyr o statws cyfartal.
Nid Cymru yw’r unig wlad sy’n wynebu amryw o heriau. Mae sgyrsiau ar hyd a lled y wlad yn adlewyrchu pryderon ynghylch yr argyfwng hinsawdd ac adnoddau naturiol, ffyniant rhanbarthol, fforddiadwyedd, iechyd a gofal cymdeithasol a seilwaith. Mae’r rhain a materion eraill yn debygol o ddiffinio ein dyfodol cyffredin dros y blynyddoedd nesaf.
Ar yr un pryd, mae ymchwilwyr, llywodraeth, busnes, y trydydd sector, sefydliadau cymunedol gwledig a threfol yn datblygu, profi ac uwchraddio datrysiadau newydd. Wrth iddyn nhw chwilio am atebion, maen nhw’n chwilio am gydweithrediadau a chyfleoedd sy’n arloesi ac yn effeithio’n gadarnhaol ar fywydau bob dydd.
Er mwyn creu dyfodol llewyrchus, rydym angen prosesau cydweithredol gwell sy’n datblygu dealltwriaeth o’n gwerthoedd, rhai gwahanol a rhai sy’n gorgyffwrdd, yn ogystal â natur gymhleth y problemau rydym yn eu hwynebu. Mewn prifysgolion a thu hwnt, mae angen i ni fynd ati o’r newydd i ddatblygu ymrwymiad unedig i werthoedd craidd, sgiliau a chymwyseddau deialog a chyfnewid gwybodaeth.
Mae’r Ganolfan Ddeialog ym Mhrifysgol Aberystwyth yn creu cyfleoedd arloesol ar gyfer cyfnewid gwybodaeth gydweithredol o fewn prifysgol sy’n cael ei harwain gan ymchwil. Drwy gynllunio a hwyluso digwyddiadau, darparu cyfleoedd hyfforddiant a chysylltu ymchwil, busnes, polisi, cymdeithas sifil a defnyddwyr terfynol eraill mewn ffyrdd sy’n cofleidio proses ac arfer deialog, rydym yn cydweithio i chwilio am atebion Cymreig i broblemau’r byd.
Beth Yw Deialog?
Ym Mhrifysgol Aberystwyth, mae deialog yn arfer unigol ac yn broses wedi’i hwyluso o gyfnewid gwybodaeth.
Mae unigolion yn arfer neu’n defnyddio deialog trwy fynd ati i wrando, gofyn cwestiynau a chwilio am fath o adnabod, sy’n cael ei ddiffinio fel ‘bod â dealltwriaeth neu wybodaeth am rywbeth neu rywun, i fod yn gyfarwydd iawn â rhywbeth neu rywun neu feddu ar brofiad personol o rywbeth neu rywun.’
Mae’r broses ddeialog wedi’i hwyluso yn cynllunio gweithgareddau yn ofalus sy’n ei gwneud hi’n haws i grwpiau amrywiol greu ymdeimlad o adnabod gyda’i gilydd a datblygu datrysiadau arloesol.
Beth Yw Cyfnewid Gwybodaeth?
Mae cyfnewid gwybodaeth yn dwyn ynghyd staff academaidd, defnyddwyr ymchwil, diwydiant, sefydliadau a chymunedau i rannu syniadau, data, profiad ac arbenigedd er mwyn cynyddu manteision ymchwil.
Mae cyfnewid gwybodaeth yn elfen bwysig o ran sut mae effaith ymchwil a chenhadaeth ddinesig yn cael ei darparu ar draws pob adran ym Mhrifysgol Aberystwyth.
Drwy ganoli deialog ar gyfnewid gwybodaeth, mae Prifysgol Aberystwyth yn blaenoriaethu datblygu cysylltiadau cydweithredol ac yn cydnabod y rôl y mae gwerthoedd craidd, byd-olwg ac emosiynau’n eu chwarae o ran effaith ac arloesi.