Arweiniwyd y prosiectau gan academyddion ar wahanol gyfnodau yn y cylch ymchwil – o’r rhai yn y cyfnod cwmpasu a’r rhai wrthi’n ymchwilio’n weithredol, i brosiectau ymchwil yn eu cyfnod diweddarach oedd yn ceisio ehangu eu potensial i greu argraff. Roeddent yn cynnwys:

• Gweithdy ac arddangosfa safle ym Mhrifysgol Aberystwyth yn dod ag amrywiaeth o bartneriaid at ei gilydd i archwilio cyfleoedd i gynyddu cynaliadwyedd y system fwyd, rhoi gwerth ar wastraff ac arloesi cynhwysion cylchol. (Gwyddorau Bywyd)
• Dod ag academyddion, artistiaid a chynrychiolwyr o gymdeithasau proffesiynol dethol, sefydliadau diwylliannol a sefydliadau treftadaeth ynghyd. Gyda’r nod o ddatblygu prosiect ymchwil sy’n edrych ar hanes a dylanwad theatr safle benodol yng Nghymru. (Astudiaethau Theatr, Ffilm a Theledu)
• Cyfarfodydd ffurfiol gydag uwch ffigyrau yn y Llywodraeth, addysg a’r Gymraeg i ffurfio canolbwynt ar gyfer cyflymu ymchwil yr Ysgol Ieithoedd a Llen i ysgolion (Cymraeg ac Astudiaethau Celtaidd)
• Gweithgaredd ymchwil a rhwydweithio personol wedi’i lunio o amgylch gweithdy Perfedd-Ymennydd Alzheimer yn San Diego er mwyn dylanwadu ar gynllunio astudiaeth yn y dyfodol, cyfleoedd cydweithredol, a lleoliad strategol rhaglen ymchwil. (Gwyddorau Bywyd)
• Gweithdy undydd i lansio canfyddiadau prosiect a ariennir gan Iechyd Cyhoeddus Cymru (Hyb ACE Cymru), Llwybr Cymreig at Heddwch. Roedd y gweithdy’n arddangos deunyddiau ac yn ail-ymgysylltu â chydweithwyr gwreiddiol, gyda’r nod o sefydlu cynlluniau ar gyfer hyrwyddo’r datblygiad a’r drafodaeth ynghylch Llwybr Cymreig at Heddwch yn y dyfodol ac adrodd straeon digidol fel methodoleg. (Hanes a Hanes Cymru/Gwleidyddiaeth Ryngwladol)
• Creu cyfleoedd rhyngweithio newydd rhwng ymchwilwyr ar wahanol bwyntiau yn eu gyrfaoedd sy’n gweithio ar ieithoedd rhanbarthol a lleiafrifol mewn sefydliadau Addysg Uwch yng Nghymru, trwy gyfres o weithdai ar-lein, gweithdy cyfnewid gwybodaeth, a chynnal paneli yng nghynhadledd flynyddol WISERD. (Gwleidyddiaeth Ryngwladol)
• Datblygu rhwydwaith o sefydliadau ac unigolion sy’n gweithio ym maes cyflogaeth anabledd – daethpwyd â sefydliadau ynghyd na fyddent wedi cwrdd â’i gilydd fel arall; nodwyd bod llawer o bocedi o enghreifftiau o arfer da o gyflogaeth anabledd ledled Cymru. (Yr Adran Ddaearyddiaeth a Gwyddorau Daear/Ysgol Fusnes)
• Gweithgareddau a gynhelir rhwng Prifysgolion Aberystwyth a Bangor i annog prosiectau a chydweithio ym maes ymchwil niwrowyddoniaeth. (Seicoleg/Cyfrifiadureg/Gwyddorau Bywyd)
• Cysylltu myfyrwyr ar ddechrau eu gyrfaoedd, ôl-raddedigion ac ysgolheigion â chynulleidfa fwy o ymgyrchwyr a llunwyr polisi mewn digwyddiad gwrth-hiliaeth gyda Race Council Cymru. (Yr Adran Ddaearyddiaeth a Gwyddorau Daear)
• Datblygu ar berthynas sefydledig rhwng Prifysgol Aberystwyth a Coed Cadw i gychwyn grŵp cydweithredol trawsddisgyblaethol, aml-sefydliadol fydd yn meddwl am gwestiynau ymchwil a chyfleoedd ariannu, ac yn datblygu cais ymchwil sy’n canolbwyntio ar archwilio effeithiolrwydd a manteision amgylcheddol ailgoedwigo ucheldiroedd gyda dull amaeth-goedwigaeth. (Yr Adran Ddaearyddiaeth a Gwyddorau Daear)
• Gweithdy deuddydd fel man cychwyn ar gyfer cydweithredu rhwydwaith agosach gan arwain at gyngor polisi ymarferol ar reoli ac ennill goruchafiaeth mewn sefyllfaoedd o ddwysáu niwclear. Rhagwelir y bydd hyn yn arwain yn y pen draw at friffiau polisi y gall asiantaethau perthnasol y llywodraeth eu defnyddio wrth gyflawni’r amcanion a nodwyd yn yr Adolygiad Amddiffyn Strategol. (Gwleidyddiaeth Ryngwladol)
• Cynhaliwyd gweithdy ar y cyd gan Brifysgol Aberystwyth a Mentera ym mis Mai 2026 i ymchwilio i’r heriau i Stiwardiaeth Gwrthficrobaidd a wynebir gan y sector anifeiliaid anwes yng Nghymru. Gwahoddwyd Milfeddygon a Nyrsys Milfeddygol Cofrestredig o bob rhan o Gymru i fynychu diwrnod o weithdai i adnabod yr heriau a wynebir wrth ragnodi gwrthfiotigau a sut y gallai rhwydwaith Hyrwyddwyr Rhagnodi Milfeddygol (VPC) gefnogi eu hanghenion. (Gwyddorau Bywyd/Ysgol Filfeddygol)
• Digwyddiad lansio ar gyfer y grŵp EMPOWER, sy’n ymrwymo i gynnal ymchwil a chreu dulliau arloesol i wella canlyniadau mewn gofal endometriosis. Sefydlodd y digwyddiad rwydwaith o weithwyr proffesiynol ac ymchwilwyr sy’n gweithio yn y maes hwn. (Seicoleg)
• Daeth grŵp o 10 unigolyn gyda phrofiad bywyd mewn gwahanol feysydd ynghyd i greu panel o ‘arbenigwyr trwy brofiad’ mewn amrywiol feysydd. Mae’r meysydd yn cynnwys iechyd meddwl a’r defnydd o wasanaethau iechyd meddwl, iechyd corfforol megis goroesi strôc, ymgysylltiad â’r gwasanaeth cyfiawnder troseddol, cyfrifoldebau gofalu, a gwasanaethau milwrol. Trwy gysylltu’r panel ag ymchwilwyr PA rhoddir y cyfle iddynt ymgysylltu â chymunedau cyn iddynt lunio eu hymchwil. (Seicoleg)
• Bu ymweliad rhwydweithio rhwng ymchwilwyr IBERS, Techion, Coleg Sir Gâr, a Gardd Fotaneg Genedlaethol Cymru yn gyfle i adeiladu a chryfhau rhwydweithiau newydd a chyfleoedd ymchwil cydweithredol ar draws ystod enfawr o bynciau gan gynnwys monitro iechyd da byw a chanfod clefydau’n gynnar, strategaethau rheoli tir cynaliadwy, a’r defnydd o fetabarcodio DNA i ddadansoddi diet da byw a monitro bioamrywiaeth. Fe aethant ati hefyd i edrych ar y ffordd mae technolegau sy’n dod i’r amlwg gan gynnwys dronau, deallusrwydd artiffisial, ac offer synhwyro uwch yn trawsnewid ymchwil amaeth-amgylchedd ac yn cefnogi systemau ffermio mwy doeth, mwy cynaliadwy. (Athrofa’r Gwyddorau Biolegol, Amgylcheddol a Gwledig)
• Cyfarfu ymchwilwyr Prifysgol Aberystwyth â rhanddeiliaid allweddol o gwmnïau diwydiant allweddol, y llywodraeth, ac ymchwilwyr, i drafod arloesedd mewn gwyddor pobi, cynhwysion swyddogaethol, a bwydydd grawnfwyd iachach. Amlygodd y trafodaethau hyn ddiddordeb cryf yn arbenigedd Prifysgol Aberystwyth a chyfrannu at ddatblygu gweithgareddau dilynol, gan gynnwys gweithdai cydweithredol ac ymgysylltu â rhwydweithiau becws yn y Deyrnas Unedig ac Ewrop. (Gwyddorau Bywyd)
• Fe wnaeth un o brosiectau AberCollab ei gwneud yn bosib creu grŵp cynnwys y cyhoedd sy’n canolbwyntio ar ardaloedd gwledig i ddatblygu syniadau a blaenoriaethau ymchwil ymhellach ac i greu strategaeth ar gyfer ffurfioli cyfranogiad y cyhoedd yn ymchwil iechyd gwledig Prifysgol Aberystwyth. (Seicoleg)
• Cynhaliwyd Gweithdy ar ddatblygu thygwellt lluosflwydd yn ffynhonnell brotein gynaliadwy yn y bio-burfa BEACON i ddarpar bartneriaid academaidd a masnachol y dyfodol, gyda’r nod o ddatblygu ceisiadau a phrosiectau grantiau cydweithredol yn y dyfodol. (Athrofa’r Gwyddorau Biolegol, Amgylcheddol a Gwledig)

Meddai Dr Jennifer Wolowic, Prif Arweinydd y Ganolfan Ddeialog: “Mae AberCollab wedi bod yn enghraifft wych o sut y gall deialog ac ymgysylltu ag eraill gyfrannu at bob cam o’r broses ymchwil – o gynhyrchu syniadau a phrosiectau sy’n dod i’r amlwg i ehangu a derbyn rhaglenni ymchwil. 

“Mae’r adborth o’r rownd gyntaf o gyllid AberCollab wedi bod yn gadarnhaol iawn. Mae ymchwilwyr wedi mynegi eu bod yn teimlo bod y broses yn gyffrous a’i bod wedi arwain at gysylltiadau newydd a pherthnasoedd cryfach. Bydd sawl un yn arwain at geisiadau am gyllid yn y dyfodol ac mae pob un wedi helpu i eglurhau’r potensial ar gyfer cydweithio yn y dyfodol. Rwy’n edrych ymlaen at weld sut bydd ein hymchwilwyr yn mynd ar drywydd y camau nesaf.”