Rhoi llais i lenorion ar y cyrion

Cynhaliwyd Diwrnod Meddiannu Awduron ar Ymylol ym mis Gorffennaf 2024, gan ddwyn ynghyd awduron, cyhoeddwyr, elusennau ac ymgyrchwyr o bob rhan o Gymru i drafod y rhwystrau i gymryd rhan mewn ysgrifennu a chyhoeddi ac i greu cysylltiadau newydd.   

Yn ystod y dydd, bu amrywiaeth o baneli’n trafod syniadau ynghylch hunaniaeth, rhywedd, hil, allgáu, iechyd meddwl a chorfforol, a chreadigrwydd. Ymhlith y prif siaradwyr roedd yr awdur a’r golygydd Durre Shawar; Cylchgrawn Gwyllion; Richard Davies, cyfarwyddwr cyhoeddi Parthian Books, a’r artist a’r awdur Joshua Jones. Roedd sesiwn meic agored gyda’r nos lle rhoddwyd sylw i waith gan dros 20 o awduron cydnabyddedig a newydd.

Trefnwyd y digwyddiad gan Ganolfan Creadigrwydd a Llesiant y Brifysgol gyda chyllid o raglen AberCollab y Ganolfan Deialog ynghyd â chyllid ychwanegol gan Llenyddiaeth Cymru a nawdd gan Parthian Books a Newyddiaduraeth Cynhwysol Cymru. Roedd 40 o bobl wedi mynychu mewn person, gydag o ddeutu ddeg o gyfranogwyr yn ymuno ar-lein.

Dywedodd Dr Jacqueline Yallop, Darllenydd mewn Ysgrifennu Creadigol a Chyfarwyddwr Canolfan Ymchwil Creadigrwydd a Lles Prifysgol Aberystwyth: “Roedd y digwyddiad yn hynod lwyddiannus o ran dod â phobl ynghyd a’u hannog i drafod. Roedd yr adborth a gafwyd ar y dydd yn awgrymu bod y fformat wedi gweithio’n dda a bod cyfranogwyr yn awyddus i adeiladu ar y diwrnod.

“Roedd brwdfrydedd amlwg o blaid cael rhwydwaith bywiog fel hwn sy’n dod ag awduron a chyhoeddwyr at ei gilydd ledled Cymru i rannu profiadau a chyfleoedd, ac sy’n dechrau chwalu rhwystrau systemig. Fel trefnwyr, rydyn ni’n casglu adborth ehangach ac yn edrych ar ffyrdd o sefydlu rhwydwaith cynaliadwy, gyda Chanolfan Creadigrwydd a Llesiant y Brifysgol yn gweithredu fel canolbwynt ar gyfer gweithgareddau a chyfnewid gwybodaeth.”