Wedi wythnos o ddeialog a phrocio’r meddwl, mae Gŵyl Ymchwil Prifysgol Aberystwyth wedi dod i ben.

• 600+ yn mynychu
• 20+ digwyddiad
• 10+ lleoliad
• 7 diwrnod

Diolch o galon i bawb fu’n rhan o’r ŵyl – yn siaradwyr, trefnwyr, partneriaid, staff technegol ac arlwyo, a’n cynulleidfaoedd gwych.

Hawlio Heddwch

1 – 7 Tachwedd 2023

Bydd Gŵyl Ymchwil Prifysgol Aberystwyth 2023 yn rhoi sylw i’r modd y gall dyhead unigolion a phenderfyniad cydweithredol gael dylanwad sylweddol yn lleol, yn genedlaethol ac yn fyd-eang. Nod yr ŵyl hon yw dathlu’r unigolion, y grwpiau, a’r syniadau sydd wedi llunio heddwch yn y gorffennol, ynghyd ag archwilio ffyrdd y gellir llunio dyfodol o heddwch.

Ganrif yn ôl, â doluriau rhyfel dinistriol a phandemig byd-eang yn parhau’n fyw iawn, cynhaliwyd cynhadledd Undeb Cynghrair y Cenhedloedd Cymru yn Aberystwyth. Yr amcan oedd sicrhau dyfodol heddychlon a llewyrchus i bawb. Yn ystod y gynhadledd, cynigiodd Annie Hughes Griffiths y dylai merched Cymru apelio ar eu chwiorydd yn yr UDA i sicrhau aelodaeth eu gwlad fawr yng Nghynghrair y Cenhedloedd. Yn y misoedd dilynol aethpwyd ati i drafod â merched o bob cefndir ar hyd a lled Cymru, a chasglwyd 390,296 o lofnodion. Bellach, gan mlynedd yn ddiweddarach, mae’r ddeiseb hanesyddol wedi dychwelyd adref o sefydliad y Smithsonian yn Washington D.C. i Lyfrgell Genedlaethol Cymru yn Aberystwyth.

Wrth i ni wynebu amgylchiadau anodd gan gynnwys pandemig byd-eang, rhyfeloedd yn Ewrop a chyfandiroedd eraill, a grymoedd dybryd yr argyfwng hinsawdd, mae cenhedlaeth newydd o ddinasyddion, arweinwyr, a meddylwyr arloesol o Aberystwyth a mannau eraill yn codi i chwilio am atebion i heriau heddiw. Maent yn sefydlu rhwydweithiau dylanwadol ac yn chwilio am yr heolydd all hawlio dyfodol heddychlon a llewyrchus.